📜SEEC對每個人都有不同的意思，可能是初初認識神、決志信主、靈命成長、為主事奉等。
因為主的緣故，這個營會總是特別令人回味。每星期兩次，為你送上弟兄姊妹對SEEC的真情剖白!
🎤 由2013年開始，每年嘅SEEC對我嚟講都有唔同意義。
第一次去SEEC嘅時候，只係抱住一個「跟大隊」嘅心態。當時我信仰好片面，上帝對我嚟講亦好遠。要輪流祈禱嘅時候，我就會好驚人哋覺得我祈得唔好；但因著組員嘅鼓勵和多番嘗試，我開始識得喺祈禱當中同上帝傾偈，同神嘅關係開始近番。喺營會當中我亦認識到信仰係需要成長，而唔係一直原地踏步，亦開始為此訂下目標。
2014年係充滿住期待咁去，認識咗一班同路人。呢一年亦都係同組員喺營會之後，保持得最多聯絡嘅一年。多年互相扶持、勉勵，亦見證大家成長。
2015、16年我靈命較枯乾，因而想入營打支「強心針」。入營前因教會事奉感到疲乏，推咗做組長嘅invitation 。相信營會嘅建立本身唔係做一支「針」，而係讓弟兄姊妹有一個專心仰望神嘅空間，暫時放低煩擾嘅事情，聽神藉住講員、小組同我哋說話。
2018年，我已經唔再係學生，而係對前路迷惘嘅失業人士。咁啱其中一日係我生日，當時組長送咗本書比我，寄語我「你們要先求祂的國和祂的義，這些東西都要加給你們了」。呢句說話我好深刻，提醒我要將前路交比神帶領。感恩幾個月後就喺一個新嘅city定居咗落嚟，仲有一份唔錯嘅工，亦喺教會中搵到事奉主嘅方向。
2019年我伙拍我以前嘅「landlord 」做組長。第一次做有啲緊張，仲要係職青組。不過感恩，入到去嘅時候發現大部分組員都係喺不同地點、時期已經互相認識，所以好快熟咗，可以更深入咁分享、討論。
本來2020年一心以為可以嘗試一個期待已久嘅事奉崗位，做SEEC嘅committee 。可惜最後因一場突如其來嘅疫症，決定取消營會。雖然有啲失落，不過亦都可能避免咗變成事奉忙碌嘅「馬大」……
喺唔同時期，神都藉住SEEC嘅講員和組員提醒我要倚靠佢。感恩亦喺當中能夠經歷神，也遇上一班同路人。唔知之後嘅SEEC又會點呢?
