2020係一年充滿住無數變幻莫測嘅一年，全部野都係你估唔到嘅。由呢個疫情開始，英國第一次lockdown，再去到第二次lockdown，甚至乎去到而家第三個lockdown，我都好強烈地感受到神係呢段時間無窮嘅供應。
上年決定做SEEC committee嘅時候，原本係諗住參加咗兩次營會(包括2020年嘅營會)，咁就有多少少經驗去到背起呢一個神比我嘅使命。但係點知，就係因為呢個疫情，上年嘅營會就取消咗，而原本嘅計劃就完全唔跟我嘅劇本行啦。咁我哋正式開始籌備2021年嘅營會，我哋又遇上左疫情無止境嘅延遲，我哋係冇得揀嘅情況之下，都做咗一個前所未有嘅決定，就係網上SEEC營會。係呢兩件事上面好明顯就係我哋嘅計劃永遠都唔會照住我哋自己嘅劇本去行，而所有嘢都係跟着上帝嘅計劃去進行。上帝有佢自己嘅時間表，SEEC 2021 (40周年)係佢嘅時間表裏面就係一個網上進行嘅營會。
喺籌備當中我哋當然都有好多唔同嘅難題或者疑問，因為始終都係第一次嘅網上營會。好多籌備計劃都冇得跟住以往嘅營會去做參考，因為形式完全唔同，全部野都係要由零開始。每次開會嘅時候，當然每個人都有唔同嘅意見同諗法，爭執就一定會發生㗎啦。但感恩嘅係神將我地聚集埋一齊，而我哋每個committee都有着一個共同嘅目標，就係希望透過呢一個嘅營會，讓到更加多嘅弟兄姊妹鞏固對神嘅基礎，又或者係讓到未信嘅朋友們喺度認識神，接受神嘅愛，一齊進入神為我地所準備嘅天國。
